ڕێبازی پێغه‌مبه‌ر “صلی الله علیه وسلم” كامه‌یه‌؟

3,808

ڕێبازی پێغه‌مبه‌ر “صلی الله علیه وسلم” كامه‌یه‌؟

پێشه‌كی

 

الحمد لله‌ والصلاة والسلام على رسول الله محمد وآله وصحبه والاه.

مسوڵمانانی سه‌نگین و شیرین!

هه‌روه‌ك چۆن باغ و بێستانه‌كان به‌هۆی ئاودران و خزمه‌تكرانه‌وه‌ به‌ته‌ڕوو تازه‌یی و گه‌شی ده‌مێننه‌وه‌و به‌رو میوه‌ ده‌رده‌كه‌ن، وه‌ به‌پێچه‌وانه‌وه‌ له‌سۆنگه‌ی ئاونه‌دران و خزمه‌ت نه‌كرانه‌وه‌ سیس و په‌ژمورده‌و چرچ و زه‌رد ده‌بن و ده‌ست ده‌كه‌ن به‌ گه‌ڵاڕێزان، به‌رنامه‌و په‌یڕه‌وه‌كانیش به‌هه‌مان شێوه‌، ئه‌گه‌ر بێت و شوێن كه‌وتووانیان به‌بیری تیژی عه‌قڵ و هه‌ست و سۆزی دڵ و هێزو گوڕی بازوویان خزمه‌تیان بكه‌ن و، به‌خوێنی هه‌ناوو ئاره‌قی نێوچاوان و پاره‌و سامانیان ئاویان بده‌ن، ئه‌وه‌ بێگومان به‌ئه‌ندازه‌ی ئه‌و خزمه‌تكران و ئاودرانه‌ گه‌ش و پاراو ده‌بن و دێنه‌به‌ر، ده‌نا سیس و كه‌نه‌فت ده‌بن و زه‌رد هه‌ڵده‌گه‌ڕێن!

جا بێگومان (ئیسلام)یش له‌و یاسایه‌ ڕیزپه‌ڕ نیه‌و گه‌شه‌كردن و مانی و له‌بره‌وكه‌وتنی و نه‌مانی به‌نده‌ به‌ تێكۆشان و هه‌ڵخزانی شوێن كه‌وتووانییه‌وه‌.

پێغه‌مبه‌ری پێشه‌واشمان صلی الله علیه‌ وسلم له‌ فه‌رمووده‌یه‌كی دا فه‌رموویه‌تی: (فان الدین بدا غریبا وسیعود غریبا كما بدا فطوبی للغرباء، وهم الذین یصلحون ما افسد الناس من بعدی من سنتی) رواه‌ الترمذی من عمر بن عوف.

واته‌: بێگومان ئایین به‌ غه‌ریبی سه‌ری هه‌ڵداوه‌، وه‌ هه‌روه‌ك چۆن به‌ غه‌ریبی هاتوه‌ هه‌ر به‌ غه‌ریبیش ده‌گه‌ڕێته‌وه‌ ـ مه‌یدانی ژیان ـ جا به‌ختیاری بۆ غه‌ریبان، ئه‌وانیش ئه‌وانه‌ن كه‌ ئه‌وه‌ی خه‌ڵك له‌دوای من له‌ ڕێبازی من تێكیان داوه‌ چاكی ده‌كه‌نه‌وه‌.[1]

جا مسوڵمانی خۆشه‌ویست و به‌ڕێز!

به‌ئومێدی ئه‌وه‌ی كه‌ ئێمه‌ش خوای میهره‌بان به‌ لوتفی خۆی له‌ ڕیزی ئه‌و غه‌ریبانه‌مان بژمێرێ كه‌ بووژاندنه‌وه‌ی ئیسلام و ڕێبازی پێغه‌مبه‌ریان به‌نسیب ده‌بێ، پاش ئیستخاره‌و ڕاوێژ كردن (استشاره‌) ده‌ستم كرد به‌ نووسینی ئه‌م زنجیره‌یه‌، هیواشم وایه‌ كه‌ ئه‌م زنجیره‌یه‌ ناوو نێوه‌ڕۆكی یه‌ك بن و، ده‌ورێكی كاریگه‌ری هه‌بێ له‌ بووژاندنه‌وه‌ی دره‌ختی ئیسلامی په‌ژموده‌و، چاككردنه‌وه‌ی ڕێبازی تێكدراوی پێغه‌مبه‌ردا صلی الله علیه‌ وسلم.

هه‌ڵبه‌ته‌ من به‌و نیازه‌ی كه‌ خستمه‌ڕوو ده‌ستم كرد به‌ نووسینی ئه‌م زنجیره‌یه‌، جا نازانم تا چ ڕادده‌یه‌ك تێیدا سه‌ركه‌وتوو ده‌بم، ئه‌وه‌نده‌ هه‌یه‌ داوام له‌ تۆی شیرین و به‌ڕێز ئه‌وه‌یه‌ كه‌ هه‌رچیه‌كت به‌دڵ بوو و پێت وابوو له‌ مه‌حه‌كی قوڕئان و سوننه‌ت ده‌رده‌چێ، سوپاسی خوای له‌سه‌ر بكه‌و هه‌وڵ بده‌ خۆتیشی پێ پێبگه‌یه‌نی و له‌ خه‌ڵكیشی بگه‌یه‌نی، وه‌ هه‌ر شتێكیشت به‌دڵ نه‌بوو و پێت راست نه‌بوو زۆرت مه‌منوونم كه‌ به‌ دیاری بۆم بنێریه‌وه‌.

وَالَّذِينَ جَاهَدُوا فِينَا لَنَهْدِيَنَّهُمْ سُبُلَنَا ۚ وَإِنَّ اللَّهَ لَمَعَ الْمُحْسِنِينَ

علی باپیر

17/ رمضان /1409 كۆچی

سه‌رده‌شت

 

[1] ـ له‌ به‌ندی (17)ی ئاڵقه‌ی شه‌شه‌می زنجیره‌ی (با چاكتر ئیسلام بناسین!)دا كه‌ (ئایین)ه‌، ئه‌م فه‌رمووده‌یه‌ توێژراوه‌ته‌وه‌.

 

Comments
Loading...