سلێمانیی: مامۆستا عەلی‌ باپیر لەگەڵ ئەندامانی ئۆرگانەكانی كۆمەڵ كۆبۆوە

3,828

سلێمانیی: مامۆستا عەلی‌ باپیر لەگەڵ ئەندامانی ئۆرگانەكانی كۆمەڵ كۆبۆوە

بە مەبەستی ئاگاداربوون لە دواگۆڕانكارییەكان‌و بارودۆخی سیاسیی ناوچەكەو ناوخۆی كۆمەڵی ئیسلامیی، پاشنیوەڕۆی ئەمڕۆ سێشەمە بەئامادەبوونی ژمارەیەك لە ئەندامانی ئەنجوومەنی سیاسیی‌و سەركردایەتیی، لە كۆڕێكی داخراودا كە لە مەڵبەندی سلێمانیی ساز كرابوو، مامۆستا عەلی باپیر وتەیەكی بۆ كارگێڕان‌و ئەندامانی ئۆرگانەكانی كۆمەڵی ئیسلامیی پێشكەش كرد، تایبەت بە بارودۆخی عێڕاق لە سەردەمی نوێدا.

مامۆستا عەلی باپیر ئاماژەی بەوە كرد كە عێڕاقی نوێ بە شێوەی لاسەنگ پێكهێنراوە كە سێكوچكەی (شیعە-سوننە-كورد)ی تێدا دروست بووەو دوانیان لەسەر حسابی مەزهەبیی دانەیەكیش لەسەر حسابی نەتەوەیی، بۆیە ساقامگیریی سیاسیی‌و ئاشتیی كۆمەڵایەتیی تیایدا مەحاڵ دەبێ‌‌و، بەردەوام خاڵی نابێ‌ لە ئاڵۆزیی، ئەمە وێڕای دەستوەردانە نێودەوڵەتیی‌و هەرێمییەكان، كە ئەوەش هۆكارێكی دیكەی پشێوییەكانە.

ئەمیری كۆمەڵی ئیسلامیی گوتیشی: لەسەر ئاستی نێوان هەرێم‌و حكوومەتی ناوەند، حیزبە باڵادەستەكانی هەرێم ئەوەندە بە نەفەسی بەرژەوەندیی حیزبییەوە كاریان كردووە، نیو هێندەی ئەوە لە خەمی بەرژەوەندییە نەتەوەیی‌و نیشتمانییەكاندا نەبوون، لە هەمان كاتدا لە بەغداش بە ویژدانەوە سەیری بارودۆخی هاووڵاتیانی هەرێم نەكراوەو، زۆر جار لە بەرانبەر هەڵەی كەسێك یان حیزبێكی سیاسیی كوردستانی، سزای هاووڵاتیانی هەرێم دراوە.

تایبەت بە حكوومەتی هەرێم‌و هەڵوێستی كۆمەڵی ئیسلامیی بۆ بەشداریی لە كابینەی نۆیەم، مامۆستا عەلی باپیر ئاماژەی بەوە كرد “كابینەی نۆیەم بەسەر كۆمەڵێك كێشەو گرفتدا كەوتووە لە كاتی پێكهێنانیدا، كە وا دەكات سەركەوتنی لە داهاتوودا ئەستەم بێت”.

هەر بۆیە ئەمیری كۆمەڵ دووپاتی كردەوە وەك ڕای خۆی حكوومەتێكی لەمشێوەیە بە شایانی ئەوە نازانێت تیایدا بەشداربن بەڵام جەختی لەوە كردەوە “دوا بڕیار لای سەركردایەتیی كۆمەڵی ئیسلامییەو، هەڵوێستی فەرمی ئەوە دەبێت كە ئەنجوومەنی سەركردایەتیی تەبەننیی دەكات”.

تایبەت بەبارودۆخی نێوخۆی كۆمەڵی ئیسلامبی، مامۆستا عەلی باپیر ئاماژەی بەوە كرد كە كۆمەڵی ئیسلامیی پرۆژەیەكی ئیسلامییەو ئەندامەكانی ئارەزووماندانە تێیدا كۆبوونەتەوە، ئەوەی بەدەست هاتووە بەرهەمی ڕەنج‌و خوێن‌و شەونخونیی هەمووانە بەقیادەو قەواعیدەوە، هەموو ئەندامێك بە ئەندازەی دڵسۆزیی‌و خەمخۆریی بۆ كۆمەڵی ئیسلامیی خاوەنی كۆمەڵی ئیسلامیین‌و هەرگیز هیچ كەسمان لێ زیاد نییەو پاڵ بەكەسەوە نانێین ڕیزەكانی كۆمەڵ بەجێ بهێڵێ، خۆ ئەگەر كەسێكیش نەیویست بەردەوام بێ، ئەوا هەوڵی لەگەڵ دەدەین بەردەوام بێ‌ تا ئەو كاتەی قەناعەتی هەیە لە ڕیزەكانی كۆمەڵدا بمێنێتەوە، بەڵام كە ڕای گۆڕی، بێگومان ئازادە لە دیارییكردنی چارەنووس‌و ئایندەی خۆی.

ئەمیری كۆمەڵ گوتیشی: ئیسلامەتی لە كۆمەڵبووندا كورت هەڵناهێنین‌و، هەرگیز بە پێویستم نەزانیوە ئێمە بە بڕیار دەستبەرداری كەس ببین.

تایبەت بەئایندەی كۆمەڵی ئیسلامییش، مامۆستا عەلی باپیر گوتی: كۆمەڵی ئیسلامیی پرۆژەیەكی ئیسلامیی ڕیشەدارەو، بە قسەو قسەڵۆكی هیچ كەسێك لەكەدار نابێ‌‌و كەم ناكات‌و، سەرڕاستیی‌و پەرێزپاكیی كۆمەڵی ئیسلامیی لە تەواوی كایەكاندا ڕوون‌و ئاشكرایە.

لە كۆتاییدا ئەمیری كۆمەڵی ئیسلامیی داوای لە تەواوی ئەندامانی كۆمەڵی ئیسلامیی كرد دەست‌و دەم پاك بن لە بەرانبەر هەر یارو نەیارێك‌و، دەبێ‌ بە ئەخلاق‌و ڕەوشتیان بیسەلمێنن لە خەڵكی تر باشترن‌و، نابێ‌ باشیی‌و خراپیی هیچ كەسێك بە كۆمەڵبوون بپێون.

دواتریش لەلایەن بەشداربووانەوە چەند پرسیارێك ئاراستەی ئەمیری كۆمەڵی ئیسلامیی كراو، ڕاشكاوانە وەڵامی پرسیارەكانی دانەوە.

ڕاپۆرتی هەواڵ:

ڤیدیۆی هه‌واڵه‌كه‌:

Comments
Loading...