Ali Bapir Official Website

كێشه‌كانی هه‌رێم له‌نێوان به‌ڵێ‌‌و نه‌خێردا

26
  •  
  •  
  •  
  •  
  •  
  •  
  •  
  •  
  •  
  •  
  •  
  •  
  •  

مامۆستا عه‌لی باپیر ئه‌میری كۆمه‌ڵی ئیسلامیی كوردستان په‌یامێك له‌باره‌ی مشت‌ومڕی نێوان به‌ره‌ی (به‌ڵێ‌)و به‌ره‌ی (نه‌خێر)ی له‌مه‌ڕ ڕیفراندۆمه‌وه‌، بڵاوده‌كاته‌وه‌ ئه‌مه‌ی خواره‌وه‌ ده‌قی په‌امه‌كه‌یه‌:

به‌ناوی خوای میهره‌بان

كێشه‌كانی هه‌رێم له‌نێوان به‌ڵێ‌‌و نه‌خێردا

له‌باره‌ی مشت‌ومڕی نێوان به‌ره‌ی (به‌ڵێ‌)و به‌ره‌ی (نه‌خێر)ی له‌مه‌ڕ ڕیفراندۆمه‌وه‌، به‌پێویستم زانی ئه‌م پێنج سه‌رنجه‌ بخه‌مه‌ڕوو:

یه‌كه‌م
چه‌ندان جاری دیكه‌ش گوتوومانه‌: خه‌ڵكی كوردستان وه‌ك هه‌ر گه‌لێكی دیكه‌ی دنیا، مافێكی ڕه‌واو سروشتی خۆیه‌تی، نه‌ك هه‌ر گشتپرسیی (ڕیفراندۆم) ئه‌نجام بدات، به‌ڵكو خاوه‌نی قه‌واره‌ی سیاسیی دڵخواستی خۆی بێ‌، له‌هه‌موو به‌شه‌كانی كوردستاندا.
به‌ڵام به‌داخه‌وه‌ ئه‌و ڕیفراندۆمه‌ی باس ده‌كرێ‌، به‌هه‌ر هۆكارێكه‌وه‌بێ‌: ئانقه‌ست، یان هه‌ڵه‌، ئه‌نجام بدرێ‌ یان نا، سه‌روبه‌ر بگرێ‌، یان نا، خراوه‌ته‌ قاڵبێكی شه‌خسیی‌و حیزبییه‌وه‌و، ئه‌وه‌ش زیانێكی زۆری پێ‌ گه‌یاندوه‌و، نیزیكه‌ هه‌ر به‌ڕێوه‌ له‌باربچێ‌! بۆیه‌ش له‌وتارێكی پێشوومدا گوتوومه‌: با هه‌رچی زووتره‌ ئه‌و مۆركه‌ شه‌خسیی‌و حیزبییه‌، له‌ڕیفراندۆم بكرێته‌وه‌.

دووه‌م
نابێ‌ هیچ كه‌س نكووڵیی له‌وه‌ بكات كه‌: نه‌ك هه‌ر كارێكی گه‌وره‌و چاره‌نووسسازی وه‌ك ڕایگه‌یاندنی ده‌وڵه‌ت، بگره‌ هه‌ركارێكی دیكه‌ش، به‌بێ‌ زه‌مینه‌سازیی‌و ڕێ‌ بۆ خۆشكردن، سه‌روبه‌ر ناگرێ‌‌و، یان هه‌رئه‌نجام نادرێ‌، یان بێ‌ ئاكام ده‌بێ‌‌و، تێیدا ڕه‌نج به‌خه‌سار ده‌بین، له‌مێژووی خۆشماندا ڕووداوی وامان زۆرن په‌ندیان لێوه‌ربگرین.

سێ‌یه‌م
له‌باره‌ی (نه‌خێر) گۆیانیش بۆ ڕیفراندۆمه‌وه‌ ده‌ڵێم: وه‌ك چۆن (به‌ڵێ‌) كردنی ڕه‌هاو بێ‌ مه‌رج، حه‌وت ده‌رمانه‌ی چاره‌سه‌ری كێشه‌كانمان‌و گۆچانی جادوویی نیه‌، به‌هه‌مان شێوه‌ش: به‌ (نه‌خێر) گوتن، دنیا نابێته‌ شامی شه‌ریف‌و، گوناهه‌ خه‌ڵك به‌وجۆره‌ چه‌واشه‌ بكرێ‌: كه‌ به‌ (نه‌خێر) گوتن بۆ ڕیفراندۆم، كێشه‌و قه‌یرانه‌كانی هه‌رێم بنبڕو چاره‌سه‌ر ده‌بن‌و، خه‌ڵك‌و جه‌ماوه‌ر له‌خه‌م ده‌ڕه‌خسێ‌!

چواره‌م
كه‌واته‌: ئه‌گه‌ر به‌جددیی ده‌مانه‌وێ‌ به‌ره‌و سه‌ربه‌خۆیی بچین، با هه‌رچی زووتره‌ دوور له‌ نه‌فه‌سی مونافه‌سه‌ی حیزبیی‌و ده‌مارگیریی‌و عینادیی‌و كارو كاردانه‌وه‌، به‌ر له‌ هه‌رشتێك ته‌بایی‌و لێك تێگه‌یشتنی سیاسیی بگێڕینه‌وه‌ نێوخۆمان، به‌تایبه‌ت هێزه‌ سیاسییه‌ بنه‌ڕه‌تییه‌ خاوه‌ن جه‌ماوه‌ره‌كان‌و، له‌كه‌ش‌و هه‌وایه‌كی هێمن‌و ئارامدا پێكه‌وه‌ كۆبینه‌وه‌:

1- سه‌ره‌تا بڕیاری گێڕانه‌وه‌ی شكۆ بۆ په‌رله‌مان‌و حكوومه‌ت بده‌ین‌و ئاساییان بكه‌ینه‌وه‌.

2- ئنجا ئاوڕێكی خێرای جیددیی له‌ژیان‌و گوزه‌رانی خه‌ڵك بده‌ینه‌وه‌و له‌وهه‌موو ملیارانه‌ی له‌لای حیزب‌و خزمن، هه‌ندێكیان بۆ حكوومه‌تی فه‌رزدارو خه‌ڵكی هه‌ژار بگێڕینه‌وه‌، تاكو وێڕای چاككردنی باری ژیان‌و گوزه‌رانی خه‌ڵك، كه‌ ئه‌ركی سه‌رشانی هه‌ر حوكمڕانێكه‌، دڵخۆش‌و ئومێده‌واریشیان بكه‌ین‌و، جۆرێك له‌ متمانه‌ بۆ نێوان خه‌ڵك‌و ده‌سته‌ڵات بگێڕینه‌وه‌.

3- پاشان دوای ئه‌و هه‌نگاوانه‌، وتوێژێكی بابه‌تییانه‌و به‌رپرسانه‌ پێكه‌وه‌ بكه‌ین، له‌باره‌ی ڕیفراندۆم‌و هه‌ل‌و مه‌رجی گونجاوی‌و، سه‌رجه‌م زه‌مینه‌سازییه‌ پێویسته‌كانی دیكه‌ی.

پێنجه‌م
بێگومان بۆ هیچ كه‌س‌و لایه‌نێك ڕه‌وانیه‌ به‌ته‌نیا بڕیار بۆ خه‌ڵك‌و وڵات بدات‌و، موغامه‌ره‌ی پێوه‌بكات، قه‌یران‌و كێشه‌كانیشمان زۆر له‌وه‌ زیاترو گه‌وره‌ترن كه‌ به‌ (به‌ڵێ‌) كردن بۆ ڕیفراندۆم، یان (نه‌خێر) گوتن، چاره‌سه‌ر بكرێن.

له‌كۆتاییشدا ده‌ڵێم: هه‌ركام له‌ هه‌رێم‌و ده‌وڵه‌ت به‌هه‌موو پێكهاته‌كانیانه‌وه‌، ئامڕازن بۆ خزمه‌تی خه‌ڵك‌و، ئامانج نین، كه‌واته‌: با به‌ر له‌شیعارو ناو و نیشانی هه‌وڵ‌و پڕۆژه‌ سیاسییه‌كان، سه‌رنجی نێوه‌ڕۆكیان بده‌ین‌و، بزانین تا چ رادده‌یه‌ك ئامانج ده‌پێكن‌و ده‌بنه‌ مایه‌ی چه‌سپێنرانی دادگه‌ریی‌و ئازادیی‌و به‌خته‌وه‌ركردنی خه‌ڵك‌و جه‌ماوه‌ر.

عـه‌لــی باپــیــر
21/11/1438كـ
13/8/2017ز
هــه‌ولــێــر

Comments
Loading...