مامۆستا عه‌لی باپیر له‌به‌رنامه‌ی: (ڕووداوی ئه‌مڕۆ) له‌كه‌ناڵی ڕووداو

4,290

مامۆستا عه‌لی باپیر له‌به‌رنامه‌ی: (ڕووداوی ئه‌مڕۆ) له‌كه‌ناڵی ڕووداو

ده‌قی چاوپێكه‌وتنه‌كه‌ به‌نووسین له‌سایتی ڕووداو وه‌رگیراوه‌

رووداو – هەولێر

عەلی باپیر، ئەمیری كۆمەڵی ئیسلامی لە هەڤپەیڤینێكدا لەگەڵ تۆڕی میدیایی رووداو دەڵێت، هێشتا بە فەرمی رایاننەگەیاندووە بەشداری كابینەی داهاتوو دەكەن یان نا، بەڵام قەناعەتی وایە كە كۆمەڵ لایەنێك نییە لە كابینەی داهاتوو، لەگەڵ ئەوەشدا دەڵێت بەپێی ئیستیحقاقی هەڵبژاردن مافی خۆیانە لە كابینەی داهاتوو بەشداری بكەن. سەبارەت بە دەنگدانیش بە سەرۆكی هەرێمی كوردستان، دەڵێت فراكسیۆنەكەیان لە پەرلەمان تێبینی لەسەر ئەو یاسایە هەبووە كە سەرۆكی هەرێمی كوردستانی پێ‌ هەڵدەبژێردرێ‌، بەڵام گوێ‌ بە تێبینییەكانیان نەدراوە، بۆیە دەنگ بە بەربژێری سەرۆكی هەرێمی كوردستان نادەن.

رووداو: با لە حكومەتەوە دەستپێبكەین، مەبەستم بەشداریكردنە لە حكومەتدا. ئایا تەواو ئیدی بڕیارتان دا كە بەشداری نەكەن لەم كابینەیەی حكومەتی هەرێمی كوردستاندا؟

عەلی باپیر: بە نیسبەت بەشداری لە كابینەی نوێی حكومەتی هەرێمی كوردستان، ئێمە هەتا ئەم لەحزەیەش كە تێیداین بە فەرمی راماننەگەیاندووە بەشدار دەبین یان بەشدار نابین. لەبەرچی؟ لەبەر ئەوەی هەڵوێست وەرگرتن لەبەرامبەر شتێكدا دەبێ كە دەبێ هەبێ، ئێستا نە سەرۆكی هەرێم دانراوە و نە سەرۆكی هەرێمیش كەسی راسپاردووە كابینەی نۆیەم پێكبهێنێ. بە بۆچوونی من هەر هەڵوێست وەرگرتنێك  لە بەرامبەر شتێكی مەفقوود، شتێكی نالۆژیكییە. دەبێ شتەكە هەبێ ئەوجا تۆ هەڵوێستی لێوەردەگری، جا بە ئەرێنی بێ یان نەرێنی. من چەند هەفتەیەك لەمەوبەر لێدوانێكم دا، كە تێیدا گوتم پێموایە ئەو حكومەتەی پێكدەهێنرێ، شایستەی ئەوە نابێ ئێمە تێیدا بەشدار بین، بەڵام هەر ئەوكات گوتم هەڵوێستی فەرمیی كۆمەڵی ئیسلامی كاتێك رادەگەیەنرێ كە لایەنی بەرامبەر بێ و لەگەڵمان بكەوێتە دانوستاندن و پێمان بڵێ حكومەتەكەی چۆنە، بەرنامەكەی چۆنە و داواكردنەكەی بۆ ئێمە چۆنە، ئەو كاتە هەڵوێستی فەرمی رادەگەیەنرێ، لێرەدا مەبەستم ئەوە نییە كە ئێمە چاوەڕێی كەسین، لەڕاستیدا چاوەڕێی كەس نین، بەڵام وەكو شتی لۆژیكی و یاسایی و وەك عورفی نێودەوڵەتی بەو شێوەیەیە، واتە حكومەتەكە دەبێ راسپێردرێ و بێن لەگەڵ لایەنەكاندا قسە بكەن، ئەو كاتە ئەوان هەڵوێستی خۆیان دەبێت.

رووداو: لایەنەكان گفتوگۆیان كردووە، رێككەوتنیان واژۆ كردووە. كاتی خۆی گوتتان ئەگەر پارتی سڵاوێكمان لێبكات ئێمەش وەڵامی دەدەینەوە. بەڵام پارتی ئەو سڵاوەی نەكرد، بەو مانایەی كە گفتوگۆ بێ بۆ پێكهێنانی حكومەت



عەلی باپیر: پارتی چەند جارێك وەك سەردانی حیزبی هاتوون. بە بۆچوونی من ئەوانە كە وەك حیزب هەموو شتێكیان بڕیوەتەوە، پێش وەزعەكە كەوتوون. دەبووایە سەرۆكی هەرێم هەڵبژێردرێ، سەرۆكی هەرێم گەورەترین كوتلە راسپێرێ، پاشان ئەوەی بۆ پێكهێانی حكومەت راسپێردراوە بێت لەگەڵ لایەنەكان دانیشێ، ئەوكاتە گفتوگۆی جیدی بكرێ، بەرنامەی حكومەت پیشان بدرێ، واتە ئەوەی كە ئەو كابینەیە دەیەوێ چۆن حكومەتداری بكات و لایەنەكان تێبینییان چی دەبێ لەسەری. من پێموایە دەبوو ئاوها بێ. ئێستا كە هەندێك كەس وەك حزب هەموو شتێكی هەڵبڕیوە، بە بۆچوونی من ئەوە پێچەوانەی ئەوەیە كە لە دونیادا باوە. مرۆڤ هەندێكجار شتانێك دەڵێ وەك رەوشتێكی كۆمەڵایەتی یان تایبەتی، بەڵام تەفسیرێكی دیكەی لەسەر دەكرێ. من ئەوكات لەبارەی ئەوەوە پرسیارم لێكرا كە كاك فازڵ میرانی گوتوویەتی دەچین و سڵاو یان سڵاوی گەرمیان لێدەكەین، ئێمەش كەسێك سڵاوی گەرممان لێبكات، گەرمتر وەڵامی دەدەینەوە. بەڵام مەبەست لەوە ئەوە نییە كە ئێمە نانمان لەسەر سێڵێ سووتاوە و چاوەڕێین داخوا كەی پارتی دێ و لەدەرگامان دەدات و ئەوجار دەڵێ فەرموون. ئەوە وانییە. ئێمە هەتا بەشدار بین لە حكومەت، كۆمەڵێك مەرجمان هەیە.

رووداو: پرسیارەكە ئەوەیە ئاخۆ چاوەڕێدەكەن لەدوای راسپاردنی كوتلەی زۆرینە، لەگەڵ ئێوەدا گفتوگۆ بكەن؟ هیچ زانیارییەكتان هەیە كە لەدوای ئەوە گفتوگۆتان لەگەڵ دەكەن، بۆیە بڕیارتان نەداوە؟

عەلی باپیر: نا هۆكاری ئەوەی بڕیارمان نەداوە ئەوەیە كە شتە لۆژیكییەكە ئەوەیە ئەو كەسەی حكومەت پێكدەهێنێ راسپێردرێ و بێت بڵێ ئەوە بەرنامەی حكومەتەكەی منە، لەبارەی هەڵوێستی لایەنە سیاسییەكان پرسیاریان لێبكات، ئینجا بڵێ فڵانە لایەنی سیاسی من دەمەوێ ئێوە ئاوها بەشدار بن، تێبینیتان چییە، مەرج و بەرنامەت چییە. ئێمە لەسەر ئەوە رامانگرتووە، نەك لەسەر ئەوەی قسەیەكمان بە ئەرێنی یان بە نەرێنی بیستبێتەوە.

رووداو: نەهاتنی پارتی بۆ لای ئێوە بەمەبەستی پێكهێنانی حكومەت، نەك مەبەستی حزبی كە خۆت ئاماژەت پێدا. هەست دەكەن نەهاتنیان كاردانەوەی پارتی بێ بۆ كۆمەڵ؟

عەلی باپیر: ئەوە دەگەڕێتەوە بۆ پارتی كە چۆنی بیری كردووەتەوە، بەڵام ئێمە بە شتێكی ئاسایی دەبینین. ئێمە پێمانوایە پارتی مافی خۆیەتی بێ داوامان لێبكات یان داوامان لێنەكات، داوای لە یەكێتی و فڵان كردووە یان نەیكردووە. ئەوە مافی خۆیەتی. ئێمە بەپێی ئیستیحقاقی هەڵبژاردن بە مافی خۆمانی دەزانین دەورمان هەبێ لە بەڕێوەبردنی ئەم وڵاتەدا، بەڵام كە بە مافی خۆمانی دەزانین بەو مانایە نییە كە ئێمە بە هەموو شێوەیەك چاوەڕێ بین كە بەشدار بین.

رووداو: لەم مانگەدا مەسروور بارزانی رادەسپێردرێ بۆ پێكهێنانی حكومەت، پێتانوایە لەگەڵ ئێوە گفتوگۆ بكات بۆ ئەوەی بەشداری لە حكومەتدا بكەن؟

عەلی باپیر: دیارە ئەوەیان دەگەڕێتەوە بۆ لایەنی بەرامبەر، بەڵام بە قەناعەتی خۆم ئەو دەرفەتە زۆر كەم بووە، ئەوەیان قەناعەتی شەخسیی خۆمە. بەڵام بڕیاری فەرمی كۆمەڵی ئیسلامی لە سەركردایەتییەوە دەدرێ. دوای ئەوەی دێت و دەكەوێتە وتوێژ و گفتوگۆوە. من هیچ بەلامەوە گرنگ نییە ئەو حكومەتە ئێمەی تێدا بین یان تێدا نەبین. من پێموانییە ئەو وڵاتەی ئێمە ئەوەندە هەڵبگرێ، دەڵێن لە هەندێك وڵاتی وەك سوید پێكهێنانی حكومەت نۆ مانگ دەخایەنێ، بەڵام ئەو وڵاتەی ئێمە ئەو هەموو هەڕەشەیەی لەسەرە، هەر ناوچەكە خۆی لەناو گۆڕانكارییەكاندا دەكوڵێ، پێكهێنانی حكومەت نەدەبوو ئەوەندە دوابخرێ، ئەوە هۆكاری یەكەمە. ئەگەر دواكەوتنەكە لەسەر ئەوە بووایە سێ لایەنە سەرەكییەكەی كە دەیانەوێ حكومەت پێكبهێنن كامیان دەیەوێ كۆتایی بە گەندەڵی و قۆرخكاری دەسەڵات و هتد بهێنێ، ئەگەر لەسەر ئەوە بووایە كەس قسەی نەدەكرد، بەڵام لەسەر چییە؟ لەسەر پۆستی شەخسی و حزبییە.

رووداو: ئەگەر ئێوە لە كابینەی نۆیەمدا بەشداریش نەبن، كۆمەڵ هەر هەوڵدەدات حكومەت سەركەوتوو بێ؟

عەلی باپیر: بەڵێ، من ئەوە بە ئەرك و واجبێكی شەرعی خۆم و هەموو تاكێكی موسوڵمان دەزانم. حكومەت لەڕاستیدا دەبێ خزمەتی هەموو لایەك بكات، بۆیە من بە واجبێكی شەرعی دەزانم كە ئەو حكومەتە تێیدا بین یان تێیدا نەبین، كە زیاتر لەوە دەچێ تێیدا نەبین، هەوڵبدەین بۆ سەركەوتنی، رەخنەی بنیاتنەری لێدەگرین،  هەڵەی بۆ راست دەكەینەوە. جاران دەیانگوت تۆ نازانی ئۆپۆزیسیۆن بی، دەمگوت بۆچی، دەیانگوت ئەگەر وەزیرێك شتێكی باشی كرد چۆن دەبێ دەستخۆشی لێبكرێ، منیش دەمگوت خۆ ئۆپۆزیسیۆن و حكومەت دوژمنی یەكدی نین، بەڵكو ئۆپۆزیسیۆن دەبێ رەخنەی بنیاتنەر بگرێ و دڵسۆز بێ و ئەگەر ئەو حكومەتە لایدا راستی بكاتەوە، نەك ناشیرینی بكات و بیڕوخێنێ. حكومەتیش نابێ بە چاوی دوژمن تەماشای ئۆپۆزیسیۆن بكات، بەڵكو حكومەتیش دەبێ بڵێ ئۆپۆزیسیۆن دڵسۆزی منە.

رووداو: یەكگرتوو كە ئۆپۆزیسیۆنبوونی هەڵبژاردووە دەڵێ ئۆپۆزیسیۆنی “یەكگرتووانە” دەبین. ئەگەر كۆمەڵ ئۆپۆزیسیۆن بێ، ئۆپۆزیسیۆنێكی چۆن دەبێ؟

عەلی باپیر: ئێمە هەوڵدەدەین ئۆپۆزیسیۆنێكی شەرعیانە و دڵسۆز بین، واتە فیعلەن هۆكارێك بین بۆ راستكردنەوەی حكومەت، ئەگەر لار بوو، دەستخۆشی لێكردنیان ئەگەر چاك بوون.

رووداو: ئەگەر ببنە ئۆپۆزیسیۆن لەگەڵ یەكگرتوو دەچنە یەك بەرەوە یان دوو ئۆپۆزیسیۆنی جیادەبن؟

عەلی باپیر: ئێمە لەگەڵ یەكگرتوو هەست بە جیایی ناكەین، ئێمە لەگەڵ برا و خوشكانمان لە یەكگرتووی ئیسلامی خۆمان بە نزیك دەزانین، لەڕووی فیكری و ئایدیۆلۆژی و ئاكار و ئامانجەكانمانەوە. هەڵبەت دیارە هەر كەسێك بە نەفەسی خۆی و بە شێوازی خۆی كاری خۆی دەكات. بێگومان ئەو كاتە ئێمە دەكەوینە بەرەیەكەوە، بتەوێ و نەتەوێ هەموومان دەبینە ئۆپۆزیسیۆن، بە نەوەی نوێ و هەر كەسێكی دیكەشەوە كە بەشدار نەبێت.

رووداو: ئێستا سێ لایەن بۆ پێكهێنانی حكومەت رێككەوتوون، ئێوەش رێككەوتنێك دەكەن بۆ ئەوەی ئۆپۆزیسیۆنێكی یەكگرتوو بن؟

عەلی باپیر: من پێموایە پێویستە ئەوە بكرێ، بەڵام ئەوە دەبێ زەمینەی بۆ خۆشبكرێ و متمانە دروستبكرێ. بە نیسبەت ئێمە و یەكگرتوو ئەو شتە هەیە.

رووداو: كاتی خۆی نامەیەكت لەلایەن شاسوار عەبدولواحیدەوە بۆ هات بۆ ئەوەی بەرەیەكی ئۆپۆزیسیۆن دروستبكەن و جەنابت ببی بە سەرۆكی بەرەكە. لە وەڵامدا گوتبووت پێویستە متمانە هەبێ. مەبەستت لەو قسەیە چی بوو؟

عەلی باپیر: مەبەستم ئەوە بوو كە لەم وڵاتەدا دەبێ واقیعەكە راست بخوێنینەوە، لە ئاستێكی بەرزی رەوشت و ئاكاردا مامەڵە لەگەڵ یەكدی بكەین. دوو كەس كە پێكەوە بە رێگایەكدا دەڕۆن دەبێ بەلایەنی كەم متمانە و لێكتێگەیشتنیان هەبێ، ئەوەش زۆر شت دەگرێتەوە. لەو ماوانەی پێشوو شاندێكی نەوەی نوێ هاتن، من هەر ئەو قسانەم دووبارە كردەوە. ئێمە هەندێك تێبینیمان لەسەر هەندێك شت و لێدوانی نەوەی نوێ هەبووە. ئێمە بەردەوام دەبێ چاو بە خۆماندا بخشێنینەوە.

رووداو: چۆن دەڕواننە رێككەوتنی پارتی و یەكێتی و گۆڕان بۆ پێكهێنانی حكومەت، لەكاتێكدا ئێوە پێشتر لەگەڵ گۆڕان هەندێك نزیكیتان هەبووە؟

عەلی باپیر: ئێمە ئێستاش خۆمان لە گۆڕان بەدوور نازانین، ئەوانیش خۆیان لە ئێمە بەدوور نازانن. ئینجا خۆ ئێمە لەگەڵ پارتی و یەكێتیش دوژمنایەتیمان نییە، ئەوانیش دوو هێزن لەو وڵاتەدا و خاوەن خەڵك و جەماوەری خۆیانن. گرنگ ئەوەیە رێككەوتنەكەیان لەپێناو بەرژەوەندی گشتیدا بێت، نەك هەر پلە و پایەی شەخسی و حیزبی. گرنگ ئەوەیە وەزیرەكانیان دەستكراوە بن و لەژێر هەیمەنەی حیزبەكانیاندا نەبن و دەستبەستراو نەبن، بە یەك چاو سەیری هەموو خەڵك بكەن، ئەگەر رێككەوتنەكەیان ئاوا بێ، ئەوە ئیشەڵڵا بەرەكەتدارە.

رووداو: بڕیارە رۆژی سێشەممە سەرۆكی هەرێمی كوردستان لە پەرلەمان دەنگی لەسەر بدرێ. ئێوە نزیكایەتی و دۆستایەتییەكتان لەگەڵ كاك نێچیرڤان بارزانیدا هەیە. دەنگی پێدەدەن یان نا؟

عەلی باپیر: فراكسیۆنەكەمان پرۆژە یاسایەكی پێشكەش كرد، بەڵام پارتی و لایەنەكانی دیكە وەریاننەگرت. ئێمە كۆمەڵێك تێبینیمان لەسەر ئەو یاسایە هەبوو كە پەرلەمان پەسەندی كرد. زەقترین تێبینیمان ئەوەیە كە بەداخەوە ئەو سەرۆكی هەرێمە لە بەرامبەر هیچ كەسێكدا بەرپرسیار نییە. ئێمە لەبەر ئەوەی تێبینیمان هەبوو لەسەر یاساكە بۆیە فراكسیۆنەكەمان بە راوێژ لەگەڵ ئەنجوومەنی سیاسی، پرسەكەمان تاوتوێ كرد و گوتمان شتێكی دژیەكە لەلایەكەوە رەخنەمان لە یاساكە هەبێ، لەلایەكی دیكە دەنگ بە كەسێك بدەین كە بەپێی ئەو یاسایە سەرۆكایەتی هەرێم دەكات. ئەگەرنا وەكو جەنابیشت ئاماژەت پێدا، ئێمە كاك نێچیرڤان دەناسین كە كەسایەتییەكی كاریگەر بووە لەو وڵاتەدا. هیچ كێشەیەكی شەخسیمان لەگەڵی نییە. بەڵام كێشەمان لەگەڵ یاساكە هەیە، ئەویش بەپێی ئەو یاسایە سەرۆكایەتی هەرێم دەكات. لەبەر ئەوە ئێمە نە كاندیدمان هەبوو، نە دەنگیش بە سەرۆكی هەرێم دەدەین.

رووداو: هەندێك لە خۆبەخشانی نەوەی نوێ و سەرۆكی جوڵانەوەكەش دەستگیركراون. ئێوە چۆن دەڕواننە ئەو پرۆسەیە، هەڵوێستتان چییە؟

عەلی باپیر: من پێموایە لەم وڵاتەدا ئەگەر بە راستی دادگا هەبێ و یاسا سەروەر بێ، هەر كەسێك تۆمەتێكی لەسەر بێ و لە دادگا ساغدەكرێتەوە، بە حوكمی دادگا مامەڵەی لەگەڵدا بكرێت. جا ئەگەر خۆبەخشەكانن، ئەگەر كاك شاسوارە. بۆ ئەوەی ئێمە ئەو وڵاتەی خۆمان نەخەینە ژێر پرسیار. با یاسا بابەتەكان یەكلایی بكاتەوە، نەك هەڵكوتانە سەر خەڵك. ئێمە تێبینیمان لەسەر ئەو شێوازە هەیە.

رووداو: لەم ماوەیە ژمارەیەك كادیری كۆمەڵ بە تایبەتی لە هەولێر وازهێنانی خۆیان راگەیاند، چۆن بوو نەتانتوانی رێگریان لێبكەن؟

عەلی باپیر: ئەوە خۆی بڕیارێكی ئیداری بوو، چەند كادیرێكی ئێمە پێوەی پابەندنەبوون. دوای ئەوەی ئەنجوومەنی بانگەواز و بەڕێوەبردن لەلایەن سەركردایەتییەوە سەرپشك كرابوو، لەبەر ئەوەی بەرپرسی مەڵبەندی هەولێر ساڵێك بوو بەرپرسایەتی نەدەكرد، مۆڵەت بوو و خەریكی خوێندنی دكتۆرا بوو. هەندێك گرفتیشی هەبوو بۆی چارەسەر نەكرا. ئەنجوومەنی بانگەواز و بەڕێوەبردن دوای راوێژ بە كارگێڕ مەڵبەندەكان و ئەندامانی سەركردایەتی لە هەولێر، برایەكیان دانا بە بەرپرسی مەڵبەند بە وەكالەت. ئەوانیش بەو بڕیارە ناڕازی بوون. لەنێو كۆمەڵ عادەت نەبووە بڕیارێك لە سەرەوە بێ، لە خوارەوە هەڵگەڕانەوەی لە دژ بكرێ. من خۆم تەدەخولم كرد و چەند جارێك بانگم كردن. لەگەڵیان دانیشتم و داوام لێكردن، بەڵام ئەوان هەر لەسەر قسەی خۆیان سوور بوون، دوایی وەك شتێكی چاوەڕواننەكراو هەریەك لە كاك سەلیم كۆیی، كاك سەعید هەركی و كاك ئیسماعیلیش بەرپرسی پێشووی مەڵبەندی هەولێر رایانگەیاند كە وازیان لە كۆمەڵی ئیسلامی هێناوە. لەكاتێكدا چەند رۆژێك پێشتر كاك سەلیممان لەگەڵ خۆمان بردبوو بۆ بەغدا.

رووداو: ئەمە هۆكاری ناوخۆیی یان دەرەكی لەپشت بوو؟

عەلی باپیر: تا ئێستا هیچ بەڵگەیەكمان نییە كە شتێكی دەرەكی بێ، پێمانوایە قەناعەتی خۆیانە. جا ئەو قەناعەتە ئێستا دروست بووە، یان پێشتر جۆرێك لە سەر پێكەوەنان هەبووە. بەڵام ئێمە ئێستاش ئەوان هەر بە برای خۆمان دەزانین.

رووداو: ئەمەی لە هەولێر روویدا، تا چەند پەیوەندی بە دانانی راوێژكارەكەی كۆمەڵ لە سەرۆكایەتی كۆماری عێراق هەیە؟

عەلی باپیر: هیچ پەیوەندی بەوەوە نییە، چونكە ئەو كێشەیە چوار پێنج مانگ پێشتر بووە.

رووداو: هیچ رێككەوتنێكتان هەیە لەگەڵ بەغدا بۆ دانانی راوێژكار بۆ سەرۆكایەتی كۆمار و دانانی باڵیۆز لە دەرەوە؟

عەلی باپیر: نەخێر ئێمە هیچ رێككەوتنمان نییە. وەكو ئیستیحقاقی هەڵبژاردن كۆمەڵی ئیسلامی لە خولەكانی پێشوو زۆر مەزڵووم بووە. كاك د.بەرهەمیش پێیزانیوە كە ئێمە مەزڵوومین، ویستوویەتی تۆزێكمان بۆ قەرەبوو بكاتەوە. تا زیاتر قەرەبوومان بكاتەوە بۆ خۆی و بۆ ئێمەش باشترە.

رووداو: راوێژكارەكەتان لێدوانێكی داوە لەسەر گشتپرسی و ریفراندۆم، دەڵێت “ئاشبەتاڵ و بەڵا” بووە. ئێوە لەگەڵ ئەو قسەیەن لە كاتێكدا جەنابتان لە گشتپرسیدا دەنگتان داوە؟

عەلی باپیر: ئێمە قسەی خۆمان دەكەین و خەڵكیش قسەی خۆی دەكات. هەفتەیەك پێش ریفراندۆم لەم ژوورەدا لەگەڵ جەنابت باسمان لەوە كرد كە زەمینەی نێوخۆیی و دەرەكی و هەرێمی خۆش نەكراوە بۆ ریفراندۆم، بۆیە لەوانە نییە بەرهەمێكی باشی هەبێ. كە فیعلەن واش بوو، هەرێمەكەمان بوو بە نیوە. بەڵام بۆچی دەنگمان دا؟ ئێستاش هەر كەسێك بڵێ دەوڵەتی سەربەخۆت دەوێ، دەڵێم بەڵێ. ئێمە گوتمان بەڵێ بۆ سەربەخۆیی، بەڵام نەك بۆ ریفراندۆمێكی سەقەت كە هەرێمەكەمان بكات بە نیوە. ریفراندۆمێك كە بە بڕیارێكی حیزبی درا، زەمینەی بۆ خۆش نەكرابوو. من قسەی خۆم دەكەم. راوێژكاری سەرۆك كۆماریش با لە كۆمەڵی ئیسلامی بێ، قسەی خۆی دەكات.

رووداو: لەو رۆژانەدا چوار ساڵ بەسەر بەستنی كۆنگرەی كۆمەڵ تێدەپەڕێ، بەمنزیكانە كۆنگرە دەبەستن؟

عەلی باپیر: بەپێی مەوعیدی خۆی بێ، دەبێ لە 31/5 كۆنگرە ببەستین. ئەو رۆژەش دەكەوێتە نێو رەمەزان، كۆنگرە دوادەخەین بۆ دوای رەمەزان. بە دڵنیاییەوە ئەمساڵ كۆنگرە دەبەستین، بەڵام دوای ئەوەی زەمینەسازییەكی باشی بۆ دەكەین. ئێمە دەمانەوێ هەندێك وەرچەرخان و گۆڕانكاری بكەین.

رووداو: مەسەلەی تەعریب دەستی پێكردووەتەوە، پێتانوایە ئەم كێشەیە چۆن چارەسەر دەكرێ؟

عەلی باپیر: یەكەم بە تەبایی نێوخۆمان، بەهێزترین كارتی ئێمە تەبایی نێوخۆمانە.تەباییش تەنیا لەسەر بناغەی دادگەری بنیات دەنرێ. دووەم: بەغداش دەبێ بەخۆیدا بچێتەوە، چیدی ماددەی 140 نەخەوێندرێ. كابینەی نوێش دەبێ زۆر كار بكات كێشەی ناوچە دابڕێنراوەكان چارەسەر بكات. چیدی ئێمە نەچین لەگەڵ بەغدا شەڕ لەسەر پۆستی حیزبی و شەخسی بكەین.

رووداو: هەموو دونیا باسی ناكۆكی ئێران و ئەمریكا  دەكات، بە بڕوای ئێوە ئەو بابەتە سەر دەكێشێ بۆ هێرشكردنە سەر ئێران؟

عەلی باپیر: ئەگەری هەیە پێكدادان لە نێوان ئەمریكا و ئێران رووبدات. ئێستا ئاگاداری پێكدادانی ئەمنی و ئابووری و سیاسی هەیە. بەڵام خوانەخواستە سەر بكێشێ بۆ شەڕ، پێموایە ناوچەكە گڕ دەگرێ، پێموایە هەرێمی كوردستانیش سەلامەت نابێ. ترسم هەیە ئێرە ببێتە شەڕگە. بۆیە دەبێ رۆڵ ببینین ئاگری شەڕ لە خۆمان دووربخەینەوە.

 

ده‌قی چاوپێكه‌وتنه‌كه‌

Comments
Loading...