دوازده‌ هه‌ڵوه‌سته‌ له‌م دۆخه‌ كۆڕۆناوییه‌دا/به‌شی دووه‌م

6,024

مامۆستا عه‌لی باپیر ئه‌میری كۆمه‌ڵی ئیسلامیی كوردستان له‌ دووبه‌شی جیادا سووده‌ مه‌عنه‌وییه‌كانی ڤایرۆسی كۆڕۆنا له‌ (12) خاڵدا ده‌خاته‌ڕوو، كه‌ ئه‌مه‌ی خواره‌وه‌ به‌شی دووه‌می بابه‌ته‌كه‌یه‌:

 

بسم الله الرحمن الرحیم

 

دوازده‌ هه‌ڵوه‌سته‌ له‌م دۆخه‌ كۆڕۆناوییه‌دا

به‌شی دووه‌م

12-8

8- زیاتر قەدری نیعمەتی خوا زانینی، مامۆستایانی مزگەوتەکان، کە ڕۆژانەو هەفتانە “بێ ئه‌وه‌ی پێوه‌ی ماندووبن” خەڵکیان بۆ کۆدەبێتەوەو پێشنوێژییان بۆ دەکەن و وتاریان بۆ دەدەن، بەڵام ئێستا كه‌ لەوە دابڕاون، ڕه‌نگه‌ باشتر قه‌دری ئه‌و نیعمه‌ته‌ بزانن!

 

بۆیە پێویستە باش سەرنج بدەن: ئایا تا چ ڕاددەیەک شایستەیی مینبەرو میحڕابەکەی پێغەمبەری خوایان “صلی الله علیە وسلم” هەیە:

 

أ- لە ڕووی شارەزاییانەوە لە باره‌ی پەیام و بەرنامەکەیەوە، ئایا بوونناسیی و تێڕوانین و ئیمان و عەقیدەو په‌رستش و تەقواو تەزکیەیان، چەنده‌ بە هی پێغەمبەری خوا دەچێ!؟

 

ب – هەروەها ئایا ڕەوشت و ئاکارو شێوەی وتاردان و قسەکردن و تەعبیرو وشەکانی زارو زمانیان، چەنده‌ وەک هی وین!؟

 

به‌دڵنیایی هه‌ركه‌سیش لەبەرچاوی خەڵک خۆی باش پێشان بدات و، قسەو دەعوای قەبەو گەورەی هەبن، کەچی بەپەنهانیی خراپە بکات، بەبێ شەرم لە خواکردن، خوای کارزان و دادگەر درەنگ یان زوو، پەردەی لەسەر هەڵدەماڵێ و بە خەڵکی دەناسێنێ و دەیتاسێنێ! ئەوەش بە زۆر جۆرو شێوە ڕوودەدات و ڕوویداوە، بەڵام پەندوەرگرتن کەمە! بۆیه‌ دڵسۆزانه‌ ده‌ڵێم: هه‌ركه‌س ده‌یه‌وێ جێگرایه‌تیی و نوێنه‌رایه‌تیی پێغه‌مبه‌ری خوا “صلی الله علیه وسلم” بكات، ده‌بێ به‌رده‌وام چاو به‌خۆیدا بگێڕێته‌وه‌و خۆی له‌هه‌ڵه‌و په‌ڵان بژار بكات.

مامۆستایانیش به‌گشتیی خۆشه‌ویستترین كه‌سن له‌لام، به‌ڵام هه‌موو توێژێك چاك و خراپی تێدان و، ده‌شگونجێ بابایه‌كی بێ كه‌ڵك و ناشایست، كۆمه‌ڵێك بخاته‌ ژێر نیشانه‌ی پرسیاره‌وه‌و عه‌یبداریان بكات!

 

9- چاو بەخۆداگێڕانەوەی بەرپرس و حوکمڕانان لە بواری مامەڵەیان لەگەڵ خەڵک و واریدات و سامانی بن دەستیاندا، بە لەبەرچاوگرتنی ئه‌م پێنج خاڵه‌:

 

یەک: زانینی ئەو ڕاستییە کە لە هەموو ڕووێکەوە، ئۆباڵی سەلامەتیی و بەختەوەریی خەڵک و کۆمەڵگایان لە ئەستۆدایەو، بەرانبەریان بەرپرسیارن.

 

دوو: هەرچی سامان و نازو نیعمەتی وڵاتە، هی هەموو هاوڵاتییانە بەبێ جیاوازیی، نەک پێیان وابێ موڵکی تایبەتی خۆیان و دەورووبەریانەو، بەخێری خۆیان، بەشی خەڵکی لێدەدەن!

 

سێ: وەک چۆن حەز دەکەن خەڵک بە قسەیان بکەن و سەرپێچیی نەکەن، با ئەوانیش فەرمانبەریی خوا بکەن و، بە ڕاستەشەقامی دادگەرییدا بڕۆن و، ملی هه‌ڵه‌ت و هه‌ڵدێری ستەم و قۆرخکاریی و گەندەڵیی نەگرن!

 

چوار: بێگومان بە چەسپاندنی دادگەریی، تەبایی بەرقەرار دەبێ و، وڵات فەڕاح دەبێ و پڕبەرەکەت دەبێ و، بە پێچەوانەشەوە، به‌پێچه‌وانه‌وه‌و، لە یاسا گەردوونییەکانی خوای دادگەریشه‌ لە ژیانی بەشەردا، کە کۆمەڵگایەکان بە ستەم (ظلم) لە بەین دەچن، وەک خوا فەرموویەتی: (…وَمَا كُنَّا مُهْلِكِي الْقُرَىٰ إِلَّا وَأَهْلُهَا ظَالِمُونَ) القصص -٥۹-، واتە: ئێمە ئاوەدانییەکان نافەوتێنین، مەگەر خەڵکەکەیان ستەمکار بێ!

مەبەستیش لە ستەم هەر جۆرە ستەمێکە: نەتەوەیی، ئابووریی، سیاسیی، کۆمەڵایەتیی…

هەروەها واریدات و سامانی وڵات، ئەگەر بە دەستی پاک و ئەمینەوە بێت بەرەکەتی دەکەوێتێ و، کەمیش بە دەستی پاک و ئەمینەوە زۆرەو، زۆریش بە دەستی ناپاک و خائینەوە، کەمە.

 

پێنج: به‌رپرسانی ده‌وڵه‌مه‌ند “كه‌ ماشه‌ڵڵا زۆرن” پێویسته‌ له‌م دۆخه‌ دژواره‌دا، هیممه‌ت بكه‌ن و ئه‌ندازه‌یه‌ك له‌سامانه‌كه‌یان كه‌ شێوه‌ی په‌یداكردنی، هه‌رچۆنێك بووبێ، هه‌ر هه‌ڵقوڵاوی ئه‌م خاك و وڵاته‌یه‌، ته‌رخان بكه‌ن بۆ هاوكاریی كردنی خه‌ڵكێكی هه‌ژارو نه‌دار، كه‌ یان هه‌ر له‌ئه‌سڵدا ئاتاجن، یان به‌كاسبیی ڕۆژانه‌ بژێو په‌یدا ده‌كه‌ن، چونكه‌ شتێكی ناهه‌ق و نالۆژیكییه له‌ترسی په‌تای كۆڕۆنا،‌ له‌ماڵه‌كانیاندا حه‌پس بكرێن و، هیچ ئاوڕیان لێ نه‌درێته‌وه‌!

بۆیه‌ش باسی ده‌وڵه‌مه‌ندانی دیكه‌ ناكه‌م، چونكه‌ كه‌م و زۆر هیممه‌تیان كردوه‌و به‌خشینیان هه‌بووه‌و، شایسته‌ی سوپاس و پێزانینیشن.

10- ئه‌م دۆخه‌ ده‌رفه‌تێكی زێڕینه‌ بۆ سه‌رجه‌م توێژه‌كانی كۆمه‌ڵگاكه‌مان، به‌تایبه‌ت مامۆستایان و قوتابییان، له‌هه‌موو ئاسته‌كانداو به‌هه‌موو جۆره‌كانیانه‌وه‌: بنه‌ڕه‌تیی، ئاماده‌یی، په‌یمانگا، زانكۆ، خوێندنی باڵا، كه‌ له‌م ماوه‌یه‌دا سه‌رگه‌رمی موتاڵاو لێكۆڵینه‌وه‌و بیركردنه‌وه‌و خۆ ده‌وڵه‌مه‌ند كردن بن به‌زانست، چ له‌بواری خوێندن و پسپۆڕیی تایبه‌تی خۆیاندا، چ له‌بواره‌ جۆراوجۆره‌كاندا به‌گشتیی، چونكه‌ بێگومان ئاستی فیكریی و ڕۆشنبیریی و، ئاسۆی عه‌قڵ و بیر فراوانبوون، چ بۆ تاك، چ بۆ كۆمه‌ڵ، كاریگه‌ریی گه‌وره‌ی له‌سه‌ر ژیان و كه‌سایه‌تیی و ڕادده‌ی گه‌شه‌كردن و پێگه‌یشتنیان هه‌یه‌و، ئێمه‌ی ئۆممه‌تی ئیسلام له‌ڕووی چه‌ندێتیی (كميّة)یه‌وه‌ زۆرین، به‌ڵام له‌ڕووی چۆنیه‌تیی (كيفية)یه‌وه‌ كێشه‌و گرفتمان هه‌یه! ئاخر ‌ژماره‌ی مسوڵمانان ملیارو نیوێك زیاترە، به‌ڵام كوا كاریگه‌ریی و هێزو پێزیان؟! كه‌ بێگومان نه‌شاره‌زایی و دواكه‌وتوویی فیكریی، بێڕه‌زاترین هۆكاری ئه‌و حاڵه‌ شپڕزو شێوا‌وه‌یانه‌، له‌حاڵێكیشدا: كه‌ یه‌كه‌مین وشه‌ی یه‌كه‌مین ئایه‌تی یه‌كه‌مین سووڕه‌تی قوڕئان كه‌ بۆسه‌ر پێغه‌مبه‌ری كۆتایی “صلی الله علیه وسلم” دابه‌زیوه‌، بریتیه‌ له‌: (إقرأ) العلق -1-، واته‌: بخوێنه‌!

11- دەرفەتێکی باش ڕەخساوە بۆ تۆکمەیی خێزانیی و چاو بەخۆدا گێڕانەوەی خێزانەکان: باب، دایک، کوڕ کچ، نەوە، لە بواری هەڵسوکەوت و مامەڵەیان پێکەوەو توندوتۆڵکردنەوەی پەیوەندییەکانیان و چاوپیداگێڕانەوەی هەڵس و كەوتیان پێكەوەو، قووڵكردنه‌وه‌ی ڕێزو سۆزو خۆشه‌ویستییان به‌رانبه‌ر به‌ یه‌كدی، كه‌ بناغه‌ی خێزان (أسرة)ی ساغ و تۆكمه‌یه‌.

12- زیاتر قەدر زانینی نیعمەتەکانی خوا بە تایبەت: ساغ و سەلامەتیی و ئازادبوون و سەربەستبوون، لە هاتن و چوون و گه‌شت و گەڕان و سەرداندا، زۆر ڕاستیش گوتراوە: {ساغیی تاجێکە لەسەر سەری لەشساغان، بەڵام تەنیا نەخۆشەکان دەیبینن}، كه‌ ئەو بنەمایە بۆ سەرجەم نیعمەتەکان ڕاستەو، پێشینانیش جوانیان گوتوە: (لە تاریکی شەوێدا، قەدری مانگ دەزانرێ).

بەڕێزان!

ئه‌وانه‌ ژمارەیه‌ک لەو هه‌ڵوه‌سته‌ پێوستانه‌ بوون کە پێموایە لەم دۆخەدا كە بەهۆی پەتای ڤایرۆسی (کۆڤید-۱۹) ناسراو به‌ (كۆڕۆنا)وه‌، ڕەخساوە، ده‌بێ هه‌بن و، بەو جۆرەش کۆڕۆنا دەکرێتە هۆکاری چەندان سوودو بەهرەی مەعنەویی گەورەو گرنگ، لە بەرانبەر زیانە جەستەیی و مادییەکانیدا.

واش پێدەچێ ماوەی بەسەرچوونی ئەم پەتایە بەبەریەوە مابێ، بۆیە با هیچکەس پەلە نەکات لە کۆتایی هێنان بە پابەندیی بە خۆپارێزییە تەندروستییەکان و، یاساو ڕێنماییه‌كانی بەرپرسان و شارەزایان لەو بارەوە، کە بێگومان به‌ قازانج و سوودی هەموولایەکن، بەڵام به‌رپرسانیش دەبێ زۆر خۆیان بپارێزن لەهەرجۆرە جیاكاریی و نادادگەرییەك، له‌نێوان هاوڵاتییاندا، به‌هۆی خزمایه‌تیی و حیزبایه‌تیی و…هتده‌وه‌.

عـەلـی باپــیـر

9/شه‌عبانی/1441كـ

2/4/2020ز

لێدوان
Loading...