مامۆستا عه‌لی باپیر: پێناسەیەکی کورتی تەفسیری قوڕئانی بەرزو بە پێز

3,956

مامۆستا عه‌لی باپیر: پێناسەیەکی کورتی تەفسیری قوڕئانی بەرزو بە پێز

 

 

مامۆستا عه‌لی باپیر دوای ته‌واوبوونی ته‌فسیره‌كه‌ی، به‌پێویستی زانی پێناسه‌یه‌كی كورتی ته‌فسیره‌كه‌ی بكات و، كات و ژماره‌ی ده‌رسه‌كانیش بڵاو ده‌كاته‌وه‌:

 

پێناسەیەکی کورتی تەفسیری قوڕئانی بەرزو بە پێز

1- ئەم تەفسیرە لێکدانەوەو ڕوونکردنەوەی کۆی قوڕئانی بەرزو بەپێزە بە هەر سەدو چواردە سووڕەت‌و، تێکڕای (6236) ئایەتەکەوەو، ماوەی دوازدەساڵ‌و یازدە مانگ‌و نیو، پێیەوە خەریک بووم لە: (13/9/2007ز) تاکو: (29/8/2020ز)، به‌ڵام له‌ ساڵانی سه‌ره‌تادا ته‌نیا له‌مانگی ڕه‌مه‌زاندا كارم له‌سه‌ر ده‌كرد.

 

2- بۆ نووسین‌و ئامادەکردنی ئەم تەفسیرە، وێڕای بەهرەمەندبوون لە سی (30) تەفسیر زیاتر، لە ژمارەیەک سەرچاوەی دیکەش سوودمەندبووم، لە: سەرچاوەکانی سوننەت، مێژوو و سیڕە، فیقهو ئوصولی فیقه، ئینسکلوپیدیاکان (دوائر المعارف)، فەڕهەنگەکانی زمان، چەند سەرچاوەیەکی زانستیی جۆراو جۆر…

 

3- كۆی ده‌رسه‌كانی ئه‌م ته‌فسیره‌: (1280) ده‌رس بووه‌، له‌: (977) سه‌عاتدا.

 

4- نەخشەم بۆ چۆنیەتی تەفسیرکردنی قوڕئان، بە حەوت قۆناغ‌و بەم جۆرە بووە:

 

یه‌ك: پێناسەی ئەو سووڕەتەو ڕوونکردنەوەی نێوەڕۆک‌و هێڵەگشتییەکانی کە ویستراوە دەست بە تەفسیرکردنی بکرێ، له‌حه‌وت بڕگه‌دا، هەروەها پێناسەکردنی ئەو کۆمەڵە ئایەتەی وەک دەرسێک تەفسیردەکرێن.

 

دوو: نووسینی دەقی ئایەتەکان کە دەکرێنە دەرسێک.

 

سێ: خستنەڕووی مانای دەقاودەقی ئایەتەکان، مانای وشە بە وشە.

 

چوار: شیکردنەوەی واتای ئەو وشانەی حەوجێی ڕوونکردنەوەن.

 

پێنچ: باسکردنی هۆی هاتنەخوار  “ئەگەر هەبێ”.

 

شه‌ش: مانای گشتیی ئایەتەکان، کە تەفسیرێکی کورت‌و پوختە.

 

حه‌وت: مەسەلە گرنگەکان، کە بریتیە لە شیکردنەوەو ڕوونکردنەوەی بڕگە بڕگەی ئایەتەکان، لەبەر تیشکی ڕێزمانی عەڕەبیی‌و، ئایەتەکانی دیکەی قوڕئان‌و، دەقەکانی سوننەت‌و، بیروڕای زانایان‌و…هتددا.

 

شایانی باسیشە: نێو نێوەش کورتە باسی جۆراو جۆرمان لەسەر بابەتە پێویستەکان خستوونە ڕوو، لەبەر ڕۆشنایی ئایەتەکانداو، بۆ تیشك خستنەسەری زیاتری واتاو مەبەستەکانیان‌و، جاری وایه‌ كورته‌ باسه‌كانی نێو ته‌فسیری سووڕه‌تێك، ده‌ (10) كورته‌ باس زیاترن.

 

5- وێڕای چاپکرانی ئەم تەفسیرە پێکەوە “کە هەتا ئێستا چواردە بەرگی لێ چاپکراون، لە سەرەتاوە تاکو (الإسرا‌‌ء)و، ڕەنگە هەمووی دەوری سی(30) بەرگ ببێ” خوا یاربێ بە بەچەند جۆرێکی دیکەش بەهرەی لێوەردەگرین:

 

یه‌كه‌م: چاپکردنی: (مانای دەقاو دەقی ئایەتەکان) لەگەڵ موصحەفدا.

 

دووه‌م: چاپکردنی: (شیکردنەوەی وشەکان)و (هۆی هاتنەخوار) لەگەڵ موصحەفدا.

 

سێیه‌م: چاپكردنی: (مانای گشتیی) وه‌ك ته‌فسیرێكی سه‌ربه‌خۆ، له‌چه‌ند به‌رگێكدا.

 

چواره‌م: چاپکردنی: (کورتەباسەکان) لە چەند کتێبێکدا.

 

پێنجه‌م: بە جیاو بەچەند بەرگێک، چاپکردنی سیڕەو ژیاننامەی پێغەمبەران “علیهم الصلاة والسلام”، کە لێکۆڵینەوەی تێروتەسەلیان لەم تەفسیرەدا لەبارەوه‌ کراوە.

 

لەخوای بەبەزەیی‌و بەخشەریش داواکارم، پیت‌و پێزێکی شایستە بخاتە ئەم تەفسیرەوەو، خوێنه‌ران باشترین سوودو بەهرەی لێوەربگرن.

18/11/1442ك

6/9/2020ز

هەولێر

لێدوان
Loading...